咸嫂咸爺情侶鞋出沒！白波鞋白高跟鞋襯到絕配搭

世間上放閃方法層出不窮，如果你頂唔順襯老土到爆嘅情侶T-shirt，仲有種低調得嚟又閃爆全球嘅放閃叫做襯情侶鞋。講起放閃，基乎每次合照都引起全球哄動嘅咸爺咸嫂，最近就以情侶鞋示人，但其實情侶鞋都唔代表一定要同款同色一模一樣先夠纏綿，好似兩位碧咸夫婦以白波鞋與白高跟鞋配襯，唔單止有返自己個性，更襯到絕戴住黑超都見到閃光，如此高招，各位潮人真係要好好學習！

咸嫂一向都係高跟鞋忠實粉絲，更加有傳聞呢位無高跟鞋不歡嘅時尚巨星係屋企都要著住高跟鞋，簡單白高跟鞋配連身裙、褲裝、小白裙都時尚無娘味，雪白顏色仲好襯年尾派對主題，姊妹們要學！

至於近年咸嫂都開始迷上白波鞋，早前亦公佈與Reebok合作，相信白波鞋一定走唔甩。如果高跟鞋真係唔係你杯茶，不妨試下白波鞋、白色襪套鞋，同樣時尚有型。

至於咸爺一向都係全球最強波鞋KOL，基本上著咩紅咩，一對白波鞋又點難得到佢呢！咸爺經常以Stan Smith現身示人，配西裝、牛仔褲、日常簡單穿搭都絕不失手，趁減價季快即刻入手啦！