LOEWE秋冬袋王又嚟啦！最新MISSY bag必成街拍紅人最愛！

自從Jonathan Anderson入主LOEWE，品牌轉投西班牙超現實主義藝術懷抱，除咗時裝帶有地中海熱情氛圍，充滿輕熟少女異國風情，所推出嘅手袋例如Puzzle Bag、Barcelona Bag、Hammock Bag等都登上當代最紅袋王之列。袋款除咗外型獨特具建築感，大多都主打變抽象形態，一個手袋可以變化出三至四種形態，亦可變化為一袋多種用法，極具功能性適合多種場合使用，故此成為都市女性頭號最愛，亦不無道理。

今年LOEWE秋冬又再推出新款手袋，Missy Bag以優雅嘅簡約主義為設計藍本，皮革則選用小牛皮與麂皮，造出材質混搭不同質感。雖然睇落袋身比較小巧，但其實同樣可以做到一袋多用效果，袋上看似裝飾嘅皮帶，其實可以變化成手提袋，附有長肩帶可以變化為側揹袋、斜揹袋，容量亦比想像中大。Missy Bag最適合秋冬配搭乾濕褸，簡濕外型唔會令造型更加臃腫，亦都適合配襯西裝外套出席正式場合，可以話係OL必備之選！最新配色有紅、橙、黑與裸灰色，圓點與鱷魚皮款式網店們暫時尚未推出，一推出小編就會馬上通知各位姊妹！