碧咸家族最有星味？Cruz Beckham傳參加K-POP偶像男團選拔！

碧咸大家族每一位成員都係城中焦點，繼Brooklyn Beckham與Romeo Beckham成為模特兒，好多人都疑問到底Cruz Beckham會唔會跟隨腳步加入娛樂圈。Cruz Beckham 2016年聖誕已經發佈過個人單曲，亦一直有表達熱愛音樂、結他、鋼琴，不時於社交媒體發佈歌唱片段。近日傳出Cruz Beckham參加國K-POP偶像男團選拔，希望加入Stardium事務所十人男子組合The Man成為練習生，實在令大家都非常驚喜！而消息傳出之後，不少韓國媒體亦向事務所確認消息，但官方並無否認，只回應需要查看參賽名單，睇嚟空穴來風未必無因！

碧咸家族每位星二代都多才多藝，大仔Brooklyn於紐約修讀攝影學位，二仔Romeo星味十足成為時尚品牌如Burberry寵兒，三仔Cruz喜愛歌唱亦有才華，至於細女Harper則專心做萬千寵愛公主，不約而同嘅就係大家都極受全球粉絲歡迎。其實Cruz Beckham日常穿搭都極具韓仔味，如果消息屬實，又一少女殺手要登場。