鄭嘉穎與陳凱琳峇里島幸福行禮！完全解構婚紗禮服細節！

鄭嘉穎與陳凱琳結婚傳聞傳得熱哄哄，終於都係日前於印尼峇里Bvlgari Resort Bali完婚！拍拖三年幾嘅呢對型男美女組合相當搶眼，鄭嘉穎唔單止抱起老婆陳凱琳由走廊走入大廳，更當眾唱《一千個願意》向老婆示愛，甜蜜放閃程度真係由地球閃到上宇宙！當日新娘子陳凱琳一身純白蕾絲嫁衣出自本地設計師Noel Chu手筆，婚紗設計以低胸corset為主，令身材非常立體但又充滿優雅氣質，再配上簡約頭飾與Bvlgari珠寶點綴，絕對係超氣質女神級新娘子！

除咗Bvlgari珠寶，當日新娘子亦以意大利國寶級鞋履品牌Rene Caovilla閃銀幻彩水晶高跟鞋現身，設計簡約極有氣質，而且仲係限量版全球僅有30對。但愛鞋女士們唔使失望，因為Rene Caovilla鞋履設計全部都大方得體，其中最著名嘅珠寶鞋一生人一定要擁有一對！

而新郎鄭嘉穎則以近年大熱美國品牌Thom Browne三件頭西裝現身，款式偏修身但又充滿年輕潮味，極受時尚達人歡迎，各位準新郎哥唔想著太傳統禮服，但又想夠莊重出得大場面的話，絕對可以一試！