玩味爆燈家庭日最佳打卡之選！
超萌親子裝Mini Me Look全攻略！

依家成日都會喺Instagram或者Facebook見到啲明星或者KOL幫小朋友襯衫，有時候仲會同佢地一齊着親子裝，又可愛又溫馨！除咗可以把握小朋友細個嘅時間一齊留多啲靚相之外，着親子裝仲可以增加親子互動，享受家庭樂。唔好以為襯親子裝係一件簡單嘅事，除咗着一樣嘅服飾之外，其實仲可以從其他幾方面入手，令整體呈現和諧感但又不失創意，時尚得嚟令人隔住MON都感受到你地之間嘅愛意啊！

最簡單嘅方法莫過於用一樣嘅印花互相呼應，例如間條、格紋等等都係好易入手嘅元素，而且仲唔會過時，輕輕鬆鬆就可以展現和諧感同親子默契。

喺材質方面入手，好容易就可以令人有一種「講不出的和諧感」。新手父母們可以試試牛仔布，依種物料夠哂百搭舒適，除咗揀同剪裁/版型嘅牛仔褲之外，同樣嘅洗水/磨破效果都可以一試！除此之外，皮革都係唔會出錯嘅選擇，夠型又有個性！

如果能夠做到色彩一致，相信親子裝嘅感覺即刻會出哂嚟啊！覺得無從入手嘅話，不妨試試中性色、大地色等等，依啲顏色安全得嚟仲好百搭，又唔怕襯唔到又唔怕過時，絕對係穩陣之選！

除咗從整體出發之外，有時喺細節上呈現一致性嘅幫助都好大架！就好似頸巾咁，本身嘅用途都好百搭，除咗戴喺頸之外，仲可以綁喺頭做頭巾，如果同小朋友髮型一樣咁就最相得益彰喇！你亦都可以考慮下從太陽眼鏡、帽或者鞋入手，同小朋友一齊型格出門！

當然啦，話哂都係Mini Me Style，各位爸爸媽媽記得要留空間俾小朋友發揮，慢慢build up屬於佢地自己嘅風格。同埋唔好只執着於搵一樣嘅款，可以利用配搭搵出一致性！不妨同小朋友喺Mytheresa一齊慢慢搵出你地兩個都鐘意嘅款式，享受一下依種另類嘅親子活動啦！唔好唔記得影相分享俾其他friend睇，同你最愛嘅寶貝一齊放閃！