拯救冷衫大行动！必学冷衫清洗保养小贴士！

唔少女士喺冬天慨时候都好钟意着冷衫，贪渠带有一种随性时尚感之余，保暖又百搭，小编自己屋企慨衣柜都有各式各样慨冷衫！要清洗冷衫呢一种时尚又易配衬慨衣物真系一啲都唔容易⋯⋯冷衫有时会缩水或起毛粒，保养起上嚟都真系几麻烦架！小编今次特别搵嚟几项大家一定要知道慨冷衫正确洗法同保养小贴士，俾大家干净清洗同时可以延长冷衫慨寿命，过一个温暖又干净慨时尚冬天！

冷衫款式可以用唔同材质制造，有啲系用棉质，有啲就用羊毛、羊绒，亦有啲系人造纤维制造，唔同慨材质都要用到唔同慨清洁方法，所以清洗冷衫之前记得要睇衣物标签，留意一下厂商建议慨冷衫洗法同埋保养方法，唔系洗错咗就心痛死喇！ ！ ！

冷衫清洗保养小贴士1: 天然手洗

要清洗天然衣物纤维，手洗几乎系最安全慨方法。首先开一大盘水，然后加入天然洗衣液。而家市面上都有唔少天然慨毛料衣物洗衣液可以选择，清洗时唔会伤害到冷衫慨纤维㗎 ！然后可以用手轻轻按压，记得千祈唔好大力搓揉，因为咁样会令到纤维失去弹性，冷衫有可能会缩水或者变形架！如果特别有污迹慨地方，就可以用一个细细慨刷去清除污迹。

冷衫清洗保养小贴士2: 入袋低温机洗

一般用人造纤维所制造慨冷衫都可以用洗衣机洗，但系用机洗唔等于冇嘢需要注意！放入洗衣机前先将冷衫内外反转，再折埋放入洗衣网袋，咁样就可以减少起毛粒慨机会！记住即使用机洗，尽量都唔好用太高慨水温，如果唔系冷衫一样会缩水或起毛粒架！

冷衫清洗保养小贴士3: 自然风干

冷衫清洗干净之后可以轻轻用手扭干水份，放喺大毛巾上面慢慢吸走多余水份，俾佢自然风干，千祈唔好用衣架挂起呀！亦都唔好俾阳光晒，如果唔系就会变形㗎啦！如果洗衣标签上面写到明可以用干衣机慨话，大家都记得拣返低温烘干，而且唔好烘得太耐。

冷衫清洗保养小贴士4: 去除毛粒

如果冷衫真系起毛粒，大家可以用返去毛粒机或者除毛器快速去除毛粒，用手拔除好容易会破坏到冷衫纤维，一定要避免啦！

冷衫清洗保养小贴士5: 折叠储存

储存方面，因为冷衫好容易变形，所以都唔好用衣架挂系衣柜，重量会造成下垂慨问题。大家尽量可以用折叠或者卷收慨方法放喺干燥慨地方！

只要大家好好运用以上冷衫清洗同埋护理慨小贴士，用番正确慨冷衫洗法，相信冷衫慨寿命就会大大延长，唔使成日因为冷衫起毛粒、缩水、变形等等问题而弃咗自己钟意慨款式，仲可以悭返拎去洗衣铺干洗慨金钱同时间。天然手洗、入袋低温机洗、自然风干依啲技巧一啲都唔难做到，大家快啲学起来啦！ ！ ！