拯救冷衫大行動！必學冷衫清洗保養小貼士！
冷衫點樣清洗保養？教你各種冷衫正確洗法！
唔少女士喺冬天嘅時候都好鍾意着冷衫，貪佢帶有一種隨性時尚感之餘，保暖又百搭，小編自己屋企嘅衣櫃都有各式各樣嘅冷衫！要清洗冷衫呢一種時尚又易配襯嘅衣物真係一啲都唔容易⋯⋯冷衫有時會縮水或起毛粒，保養起上嚟都真係幾麻煩架！小編今次特別搵嚟幾項大家一定要知道嘅冷衫正確洗法同保養小貼士，俾大家乾淨清洗同時可以延長冷衫嘅壽命，過一個溫暖又乾淨嘅時尚冬天！
冷衫款式可以用唔同材質製造，有啲係用棉質，有啲就用羊毛、羊絨，亦有啲係人造纖維製造，唔同嘅材質都要用到唔同嘅清潔方法，所以清洗冷衫之前記得要睇衣物標籤，留意一下廠商建議嘅冷衫洗法同埋保養方法，唔係洗錯咗就心痛死喇！！！
冷衫清洗保養小貼士1: 天然手洗
要清洗天然衣物纖維，手洗幾乎係最安全嘅方法。首先開一大盤水，然後加入天然洗衣液。而家市面上都有唔少天然嘅毛料衣物洗衣液可以選擇，清洗時唔會傷害到冷衫嘅纖維㗎 ！然後可以用手輕輕按壓，記得千祈唔好大力搓揉，因為咁樣會令到纖維失去彈性，冷衫有可能會縮水或者變形架！如果特別有污跡嘅地方，就可以用一個細細嘅刷去清除污跡。
冷衫清洗保養小貼士2: 入袋低溫機洗
一般用人造纖維所製造嘅冷衫都可以用洗衣機洗，但係用機洗唔等於冇嘢需要注意！放入洗衣機前先將冷衫內外反轉，再摺埋放入洗衣網袋，咁樣就可以減少起毛粒嘅機會！記住即使用機洗，盡量都唔好用太高嘅水溫，如果唔係冷衫一樣會縮水或起毛粒架！
冷衫清洗保養小貼士3: 自然風乾
冷衫清洗乾淨之後可以輕輕用手扭乾水份，放喺大毛巾上面慢慢吸走多餘水份，俾佢自然風乾，千祈唔好用衣架掛起呀！亦都唔好俾陽光曬，如果唔係就會變形㗎啦！如果洗衣標籤上面寫到明可以用乾衣機嘅話，大家都記得揀返低溫烘乾，而且唔好烘得太耐。
冷衫清洗保養小貼士4: 去除毛粒
如果冷衫真係起毛粒，大家可以用返去毛粒機或者除毛器快速去除毛粒，用手拔除好容易會破壞到冷衫纖維，一定要避免啦！
冷衫清洗保養小貼士5: 摺疊儲存
儲存方面，因為冷衫好容易變形，所以都唔好用衣架掛係衣櫃，重量會造成下垂嘅問題。大家盡量可以用摺疊或者捲收嘅方法放喺乾燥嘅地方！
只要大家好好運用以上冷衫清洗同埋護理嘅小貼士，用番正確嘅冷衫洗法，相信冷衫嘅壽命就會大大延長，唔使成日因為冷衫起毛粒、縮水、變形等等問題而棄咗自己鐘意嘅款式，仲可以慳返拎去洗衣舖乾洗嘅金錢同時間。天然手洗、入袋低溫機洗、自然風乾依啲技巧一啲都唔難做到，大家快啲學起來啦！！！
相關產品