時尚穿著
4 Dec 2019
Nicole Leung

陪伴新娘靚到盡美美出嫁!嚴選超唯美姊妹裙四大終極小貼士!
勢要與閨蜜們做索爆星級姊妹團!

揀姊妹裙的必睇攻略!

要籌備一個完美婚禮實在唔易,準備出嫁嘅新娘除咗要揀好自己嘅婚紗之外,仲要幫埋閨蜜揀適合嘅姊妹裙。畢竟閨蜜們陪自己走過咁多日子,行到最後搵到幸福嘅嗰一步,相信各位新娘子都希望可以同姊妹留低一份美好回憶,令成個婚禮更加美滿。其實揀姊妹裙真係大有學問,又想大家可以着得靚靚,又要配合婚禮主題,又唔可以揀啲太搶鏡嘅設計,一唔小心真係會好影響成個婚禮嘅觀感,所以絕對唔可以馬虎啊!不妨睇吓以下幾個揀姊妹裙嘅小貼士,跟住推介入手就唔會有錯喇!

雖然想大家都可以着得靚啲,但新娘始終係主角,太性感嘅款式例如Deep V、大露背、過短都有機搶咗新娘風頭,加上姊妹嘅身型個個都唔一樣,性感設計佢地未必啱着或者鐘意,又有機會走光,所以最好都係揀啲人人啱着嘅小清新款式,例如稍稍露肩、薄紗等等。

其實亞洲人嘅膚色一般都比較難carry深色裙,一啲淡雅粉嫩色系就會比較穩陣,而且亦較切合婚宴嘅浪漫感。另一點就係,雖然話婚姻係兩個人嘅事,但長輩嘅意見都要尊重吓,唔少長輩覺得婚姻係喜慶嘅事,亦都未必鐘意黑色、深啡色等等嘅顏色,揀之前要考慮清楚啊!

姊妹們當日為咗幫新娘子準備好一切,要處理嘅事情其實有好多,絕對唔係行行企企影吓相就完,反而要周圍奔波同長時間走動。所以揀姊妹裙都要記得揀一啲方便出入同活動嘅剪裁,亦可以選擇材質比較輕便嘅款式啊!

揀姊妹裙最好揀走簡約低調風嘅款式,太多繁複細節反而有機會顯得太老土,而且簡單啲嘅款日後就有機會喺其他正式場合重着,唔洗驚浪費!

PHOTO CREDIT:
hitched; dhgate; veaul